Berlin isch nur chli meh als e Flugstund entfernt. Scho zweimal im Winter und eimal im Summer hämmer die schöni Stadt bereist. Im Winter hämmer jewils de Wiehnachtsmärt mit feinschte Waffle oder beschtem Glüehwii gnosse. Bi eusere erschte Reis händ garschtigi Minustemperature gherrscht. Drum chömmer säge, dass es sehr viel schöni Kaffis hät. Eusi Reis im Summer, isch eigentli e Gschäftsreis gsi vom Pascal mit «Dameprogramm» für d Simone. Und s Wuchenänd hämmer dänn na draghänkt. Berlin hät eus aber au im Summer überzügt, segs mit de schöne Beizli verusse oder wäg em Fluss, wo sich beschtens für e Rundfahrt eignet.
